ဇူလိုင် ၁၂၊ ၂၀၂၅
Shy V (VOM)
နောင်ချိုအနီးဘက် ဒီနေ့ ဇူလိုင်လ ၁၂ ရက်နေ့မှာလည်း တိုက်ပွဲ ဆက်လက်ပြင်းထန်နေပြီး ကုန်းစံရွာကို ယမန်နေ့ ဇူလိုင်လ ၁၁ ရက်နေ့က နစက တပ်ဖွဲ့ ပြန်ရခဲ့ကြောင်း ဒေသခံတွေဆီက သိရပါတယ်။
“တိုက်ပွဲတွေက နောင်ချိုဘက် ခုလည်း ဖြစ်နေတယ်။ တဝုန်းဝုန်းနဲ့ လက်နက်ကြီး ပစ်သံတွေ ကြားနေရတယ်။ လမ်းတွေလည်း အားလုံး ပိတ်လိုက်ပြီ” လို့ စစ်ရှောင် ဒေသခံ တယောက်က ပြောပါတယ်။
နစက တပ်ဖွဲ့တွေက နောင်ချိုမြို့ထဲ ဝင်ရောက်တာမျိုးတော့ မကြားရသေးပဲ တောင်ခမ်းလမ်းဘက်က မြို့ အဝင်ဆိုင်းဘုတ်နားထိတော့ ရောက်လာပြီ လို့ ကြားသိရတယ် လို့ဆိုပါတယ်။
ဇူလိုင် ၁၁ ရက် မွန်းလွဲပိုင်းက TNLA ထိန်းချုပ်ထားတဲ့ နောင်ချိုမြို့နယ်ရှိ နမ့်ဆောင်ဟူး ကာကင်း ခံစစ်ကုန်းကိုလည်း နစက တပ်ဖွဲ့ဘက်က နေရာယူလိုက်ပြီး ဆက်လက် ထိုးစစ်ဆင်နေတယ်လို့ ရှမ်းပြည်နယ်မြောက်ပိုင်းရဲ့ စစ်ရေးအခြေအနေ လေ့လာစောင့်ကြည့်နေတဲ့ အမျိုးသား တယောက်က ပြောပါတယ်။
TNLA တပ်ဖွဲ့ရဲ့ ခံစစ် အနေအထားအရ ဒရုန်း နဲ့ လက်နက်ကြီးကြောင့် ခံစစ်ပြင်ထားတဲ့ ကာကင်းတွေမှာ အင်အားလျှော့ကာ ပျောက်ကျားစနစ်နဲ့ ကျင့်သုံးရင်း ခုခံ နေကြောင်းသိရတယ်လို့ ဆိုပါတယ်။
ယမန်နေ့ ညနေ ၃ နာရီ ဝန်းကျင်ခန့်က တံတားဦး လေတပ်တက် ဂျက်ဖိုက်တာ တစီး နောင်ချို့မြို့၊ ဈေးရပ်ကွက် နယ်မြေ ၁၀ မှာ လေကြောင်းနဲ့ ၂ ကြိမ် ဗုံးကြဲ တိုက်ခိုက်ခဲ့ကြောင်း ဒေသခံတွေဆီက သိရပြီး စစ်ရှောင်ကုန်ပြီ ဖြစ်တာကြောင့် လူ အထိအခိုက်တော့ မရှိဘူးလို့ ဆိုပါတယ်။
နောင်ချိုမြို့နယ် ကုန်းစံရွာကို ဇူလိုင်လ ၁၁ ရက်နေ့က ပြန်လည်သိမ်းပိုက်ခဲ့ပြီး ဂုတ်ထိပ်ဘက်ကို ဆက်ပြီး ထိုးစစ်ဆင် နေကြောင်း နစက တပ်ဖွဲ့နဲ့ နီးစပ်သူက ပြောပါတယ်။
ဂုတ်တွင်း ကားလမ်းရဲ့ အပေါ်ဘက် တောင်ကြောကို နစက တပ်ဖွဲ့က စိုးမိုး နေရာယူနိုင်ဖို့ ပြင်ဆင်လာတာ တွေ့ရတယ်လို့ ဆိုပါတယ်။
နောင်ချိုမြို့နယ်ရှိ ကျောက်ကြမ်း၊ ကျောက်တော၊ နမ့်ပါတက်၊ ကျောက် ပြုတ်၊ နားမုံနဲ့ ရေမောင်းတန် ရွာတွေဘက် ဇူလိုင်လ ၁၁ ရက်နေ့မှာလည်း နှစ်ဖက် တိုက်ပွဲဆက်လက် ဖြစ်ပွားနေပြီး နစက တပ်ဖွဲ့ ဘက်က လက်နက်ကြီး၊ ဒရုန်း တွေနဲ့ ပစ်ကူတိုက်ခိုက် ကြောင်း PSLF/TNLA သတင်းနှင့်ပြန်ကြားရေးဌာန က သတင်းထုတ်ထားပါတယ်။
